let, na ken san navigal još s vašen pokojnen ocen. Da su otac živi, oni bi dali »Vihor« stavit va muzej, vi govorite da ga potopin, zapalin, i ja, ja?

— Stareji ste od mane, barba, pa san van pustil, da rečete svoju. Znan, niste vi jedini, ki tako misli o moru i pomorstvu. Tako su misleli i bakarski principali, ki nisu verovali va paru i železo, leg va drvo i jedra. Drvo i jedra su sagnjileli još prvo leg su oni umrli, i tako su pod stari dani na svoje oči gledali kako su para i železo potisnuli i uništili jedra. Oni nisu verovali pare leg jedron. Za sadanji promet, vi ne verujete va brzinu: a ča je uništilo jedra leg brzina? Para je potisla jidra i uništila naše pomorstvo, aš nismo imeli ljudi ki bi znali videt dalje od nosa. I danas brzina odlučiva. Zač da ja držin »Vihor« od 2500 ton, kad moren kupit brod od 5000 ton, ki će mi nosit dvaput tuliko pa i triput koliko »Vihor«, aš ćeš imet baren duplo veću brzinu od ove vaše karampani.

— Imate pravo! — potvrdi kapetan Randić. — Znate, teško je, mi kapitani…

— Ča vi kapitani? — plane Milivoj. — Vi ste šoferi i niš više! Vaša sposobnost je ovisna o brzine, gradje i veličine broda, na ken navigate, ne o van. Nan danas ni trebe opic, ke će se prtit po jarboleh, leg ljudi ki će znat, ča se more, ča se ne more, ča je korisno a ča ni. Sami ste mi cera rekli na brodu, da vas si pretiču va Mediteranu. Kako i nete, kad i oni najveći delaju šešnajst milj, a vi puzite sa šest ako imate vetar va krmu, ako van je va proru, onput se komać mičete par milj. Je to brod, recite, i more se s takoven brodon poć naprvo, ča zaslužit i dalje se razvijat?!

— To vi bolje znate. Ja san svoju rekal.

— Rekli ste svoju? Ja svoju znan, a kad bite zel više put olovku v ruku došli bi te na istešo s manun. Smo se razumeli, barba?

— Vaše naredjenje, moje izvršenje.