Svi ti Turci bihu bega Taralije.
Svakoga derihu gdo se š njimi bije.
Ta pod kopus viče, ta zvoni čingrije,
Ti se sabljom diče da j’ ustra, da brije.
I bihu po paši konje raspustili;
Tada ovi naši na njih su udrili.
Tomu kopus pade, ta čingriju varže.,
Ta konja popade, tomu se otarže,
Ta sablju polati da čini ča more,
Ta pleća obrati bižeć zlo ter gore;
Tomu glava hvarkne kad sabljom udare,
Toga kopje barkne, toga konj potare;
Toga ta poteže, zgrabiv k zemlji varže
I primohši sveže ča more najbarže;
Ta harbon udaren leži dušu beruć,
Ta z pukše oparen ganut se ni moguć.
Niki ranjen viska ter u blato gazi,
A niki se tiska u tarstje ter plazi.
I beg Taralija, i ranjen i bijen,
Kakono gidija sakri se razbijen,
Sebi, svomu rodu, jer nima razuma,
Sramotu i škodu učini prez uma.
Družbu mu pobiše, brata odvedoše,
Blago mu podbiše, jer s’ on nosi loše,
Šator mu razbiše i ne biše lini,
Haznu mu obiše, vzeše sultanini.
Od zlata, od svile hazdije pograbiv
Čarljene i bile ter s’ u nje opraviv,
Plineći gredihu na konjih vojnici,
A pišci derihu vapijuć: “Bod’, sici!”
Išćuć jih ne stanu, našadči jih biju,
Turci se ne ganu, taje se i kriju.
Tu na kmetskih kolih blago napartiše
Tih Turak oholih kino usmartiše.
I begovih kamil napartiše tokoj
Srebra, zlata i svil, učiniv ta poboj;
I mazgov pedeset naravi opake
I parip šezdeset, marhe svakojake.
I šator i dundar begov naši vzeše,
Jednu golemnu stvar ča Turkom oteše.

page prethodnih